У рамках праектаў мы мелі магчымасць прадставіць вучням свае работы ў фармаце анлайн-урока. Гэта быў цікавы і карысны досвед. Мы змаглі наладзіць кантакт з навучэнцамі і зацікавіць іх важнай гістарычнай тэмай гета.
Каб заахвоціць вучняў і стварыць спрыяльныя ўмовы для лепшай апрацоўкі матэрыялаў, мы выкарысталі шэраг дыдактычных метадаў. Акцэнт быў зроблены на інтэрактыўнай методыцы, бо мы імкнуліся не толькі расказаць пра Зэльму Меербаўм, але і матываваць школьнікаў даведацца больш пра паэтку і гістарычныя падзеі, якія паўплывалі на яе лёс і творчасць.
Мы паспрабавалі пабудаваць урок у форме дыялогу, каб дзеці таксама прымалі ў ім актыўны ўдзел. Таму мы пачалі з невялікай інтэрактыўнай праграмы, каб зацікавіць вучняў. Мы паказалі фотаздымкі, звязаныя з жыццём Зэльмы, спытаўшы навучэнцаў, якія асацыяцыі яны выклікаюць у іх і ці ведаюць тыя, якога перыяду жыцця Зэльмы гэтыя фотаздымкі тычыцца. Пасля гэтага мы правялі апытанне, каб даведацца, што дзеці ўжо ведаюць пра паэтку. Такім чынам, мы хацелі, каб вучні зацікавіліся пытаннямі, на якія ў іх не было адказаў, і паспрабаваць знайсці іх пасля ўрока на сайце. Такая актуалізацыя ведаў дапамагла выбудаваць далейшую працу на ўроку, а таксама вызначыла аспекты, на якія неабходна было звярнуць вучням увагу.
Другая частка ўрока была прысвечана творчасці паэткі. Мы пазнаёмілі навучэнцаў з падкастам Пятра Рыхло і абмеркавалі яго, а таксама паслухалі вершы паэткі (у групах) і абмеркавалі ролю паэзіі ў жыцці чалавека. Школьнікі падзяліліся ўласнымі асацыяцыямі адносна вершаў Зэльмы.
Трэцяя частка ўрока была пра іншы праект, звязаны з Зэльмай Меербаўм, а менавіта пра некамерцыйны тавар. Спачатку мы правялі “мазгавы штурм” на тэму “якія існуюць спосабы адраджэння літаратуры ў паўсядзённым жыцці?”, а потым перайшлі да нашага крэатыўнага падыходу ў праекце. Дзяцей гэта вельмі зацікавіла. Значная частка вучняў выказала жаданне прыняць актыўны ўдзел у распаўсюдзе матэрыялу.
Нам было вельмі важна даведацца меркаванне школьнікаў па дадзенай тэме, а таксама па міні-праекце. Таму ў канцы занятку мы папрасілі іх пакінуць адказ на пытанне, што больш за ўсё спадабалася з таго, што яны сёння даведаліся пры дапамозе праграмы Menti. У выніку мы атрымалі шмат прыемных фідбэкаў (напрыклад: “крэатыўны падыход”, “цікавая інфармацыя”, “паэзія”, “створаны сайт” і пад.). Нас гэта матывуе працаваць і далей у падобным тэмпе, а дзяцей – вучыцца і пазнаваць нешта новае.
