Апошнія сляды гета | Семінар у Гродне, дзень трэці


11-10-2020 | Krystsina Marchuk

У завяршаючы дзень семінара каардынатар праекта ў Гродна, кандыдат гістарычных навук Алесь Радзюк правёў экскурсію па яўрэйскаму Гродна. Гісторык распавёў, што ў горадзе ёсць розныя тэматычныя маршруты, па якіх традыцыйна водзяць турыстаў, аднак няма распрацаванага гіда на яўрэйскую тэму. Хоць, як у многіх еўрапейскіх гарадах, у Гродна ў ХХ стагоддзі ў розныя гады яўрэйскае насельніцтва складала да паловы ад агульнай колькасці жыхароў. Гэтае аблічча горада назаўжды змянілася пасля ІІ Сусветнай вайны. 

Алесь Радзюк паказаў студэнтам межы гродзенскага гета №1. На месцы, дзе была брама, вісіць мемарыяльная шыльда. У горадзе яшчэ было гета №2, аднак пра яго існаванне сённяшнім гараджанам не нагадвае нічога. 

Студэнты зайшлі ў Вялікую харальную сінагогу, гісторыя якой пачынаецца ажно ў 16 стагоддзі. У часы апошняй вайны тут зрабілі пункт збору яўрэяў перад адпраўкай у лагеры Польшчы. У савецкі час у сценах прыгожага будынка былі склады, і толькі ў 90-х сінагогу вярнулі яўрэйскай супольнасці. Сёння гэта дзеючая і адна з самых прыгожых сінагог Еўропы.